2026 yil 23 fevralda «UzAssets» AJda Citibank vakillari bilan ishchi uchrashuv bo‘lib o‘tdi.

Uchrashuv davomida tomonlar davlat kompaniyalari portfeli bilan hamkorlikning istiqbolli yo‘nalishlarini muhokama qilishdi, shu jumladan investitsiya dasturlarini amalga oshirish uchun uzoq muddatli moliyalashtirishni jalb qilish masalalariga to‘xtalib o‘tildi.

Alohida e’tibor eksport-kredit (ECA) va loyiha moliyalashtirish instrumentlariga, xalqaro kapital bozorlarida obligatsiyalar chiqarish imkoniyatlariga, shuningdek qarz yukini optimallashtirish va qarz manbalarini diversifikatsiya qilish, derivativ instrumentlarni rivojlantirish hamda moliyaviy xavflarni kamaytirishga qaratilgan strukturalangan yechimlarga qaratildi.

Shuningdek, barqaror rivojlanish va ESG kun tartibidagi masalalar muhokama qilindi. Tomonlar «yashil» va boshqa tematik obligatsiyalar chiqarish potensialini ko‘rib chiqdilar. Davlat kompaniyalarining investitsiya jozibadorligini oshirish maqsadida xalqaro ma’lumot oshkor qilish standartlari va ESG-reytinglarni joriy etishning ahamiyatiga e’tibor qaratildi.