2026-yil 1-aprelda «UzAssets» AJda Xalqaro valyuta jamg‘armasi delegatsiyasi bilan uchrashuv bo‘lib o‘tdi. Delegatsiyaga O‘zbekiston bo‘yicha missiya rahbari Yasir Abdih boshchilik qildi.

Uchrashuv davomida tomonlar O‘zbekiston davlat korxonalarini transformatsiya qilishning asosiy yo‘nalishlarini muhokama qildilar, jumladan ularning samaradorligini oshirish, zamonaviy korporativ boshqaruv standartlarini joriy etish va shaffoflikni kuchaytirish masalalari.

«UzAssets» AJ vakillari kredit va ESG reyting tizimini rivojlantirish bo‘yicha erishilgan yutuqlar, shuningdek, moliyaviy hisobotlarni xalqaro standartlarga (IFRS) muvofiq tayyorlash amaliyotining kengayishi haqida ma’lumot berdilar.

Shuningdek, O‘zbekiston Respublikasi Iqtisodiyot va moliya vazirligi hamda «UzAssets» AJ hamkorligida yaratilayotgan 22 yirik davlat kompaniyasining kredit majburiyatlarini monitoring qilish platformasining loyihaviy versiyasi taqdim etildi. Xalqaro valyuta jamg‘armasi ushbu platformani funksionalligi va qarz majburiyatlarini boshqarishda shaffoflik va samaradorlikni oshirish potentsialini yuqori baholadi.

Tomonlar shuningdek, davlat korxonalarining xalqaro kapital bozorlariga chiqish istiqbollarini muhokama qildilar.

Bundan tashqari, birlamchi jamoat aksiyalari joylashtirilishi (IPO) va obligatsiyalar chiqarish rejasi ko‘rib chiqildi, bu esa moliyalashtirish manbalarini diversifikatsiya qilish va qarz xarajatlarini kamaytirishga qaratilgan.