2025-yil 1–5 dekabr kunlari “UzAssets” AJ neft-gaz sektori mutaxassislari 2025–2026 yillarga mo‘ljallangan “O‘zbekneftgaz” AJ transformatsiya dasturi doirasida, korxonaning ishlab chiqarish vazifalariga muvofiq resurslarni muvozanatli taqsimlash uchun yagona integratsiyalashgan rejalashtirish tizimini yaratish maqsadida, Sho‘rtan neft va gaz qazib chiqarish boshqarmasiga tashrif buyurdi.

Sho‘rtan neft va gaz qazib chiqarish boshqarmasi mazkur loyiha uchun pilot hudud sifatida tanlandi, chunki uning ishlab chiqarish va rejalashtirish jarayonlari barqaror tashkil etilgan bo‘lib, resurslarni rejalashtirish va boshqarishga yangi yondashuvlarni samarali joriy etish imkonini beradi. Tashrif davomida “UzAssets” AJ mutaxassislari korxona rahbariyati hamda tegishli bo‘limlarning yetakchi mutaxassislari bilan yangilangan ishlab chiqarish-iqtisodiy dasturini ishlab chiqishning asosiy yo‘nalishlarini muhokama qildilar. Muhokamalarda boshqarma boshlig‘i, bosh muhandis, shuningdek, Sho‘rtan neft va gaz qazib chiqarish boshqarmasining sex va xizmatlar rahbarlari ishtirok etib, mavjud jarayonlarni kompleks tahlil qilish hamda ularni optimallashtirish istiqbollarini ko‘rib chiqish imkonini berdi.

Ishchi uchrashuvlar davomida quyidagi masalalar ko‘rib chiqildi: - xarajatlarni taqsimlashning shaffofligi va samaradorligini oshirish;

- biznes-reja, byudjet va xaridlar rejasini kelishish jarayonlarini tezlashtirish;

- tovar gazining va boshqa mahsulotlarning maqsadli tannarxini konlar va quduqlar klasterlari kesimida tahlil qilish vositalarini joriy etish;

- moliyaviy resurslar, xaridlar va pudrat shartnomalarini rejalashtirish uchun kelishilgan normativlarni qo‘llash;

- uskunalarni ekspluatatsiya qilish va ta’mirlash samaradorligini oshiruvchi yagona ishlar jadvalini shakllantirish.